28 feb. 2011

Loup nao de boesch !



Diene voot op 't gaaspedaal

em mer rieje, sjtop en sjtap oet

Loup nao de boesch !



geneet van de frisse lóch en de natuur

veur det se verdord en besjummeld bös

van det binne zitte of dien drök laeve

Loup nao de boesch !



vergaet ins dae agenda en 't renne

van de ein vergadering nao de angere

Loup nao de boesch !



dao staon de buim op dich te wachte

en de veugel óm, veur dich, voloet te fluite

mer doe wils alles wete, alles mitmake, alles vertaere

eine maagsjwaer kins se d'r van kriege

Loup nao de boesch !



num dich bótterhamme mit en ein flesj water

geneet van dae natuur, of 't lente, zomer, herfs of wintjer is

pak diene tessjeplak

en maak dien naas zuver

des se alles good kins ruke

óm de vitamine van de boesch op te sjnoeve

daorum zègk ich uch:

Waerd de sleur en de zörg van alledaag te väöl….?

Loup nao de boesch !







va: Mariet Utens oet Ech.

Sjrièverskrink Midde-Limburg Ech






Geen opmerkingen: