der Colla haed wer ein nuuj book....

Titel: Platbook 3
Óngertitel: Gebaorte en doeëd
Redactie: Colla Bemelmans
ISBN: 978-90-78407-59-1
Pries: 9,90


Vuurwoerd

E book mit gedichte en verhaole rónd Gebaorte en Doeëd.
D'r zint väöl luuj die vraoge: besjteit d'r gein book mit gedichte in 't plat die ich de luuj bie 'ne duip of 'n aovendwake kin gaeve?
Vreuger houw de juffrouw van de lieëgere sjoeël zoeë book mit "Gelegenheidsversjes".
D'r zint natuurlik nog mieë sjerneermomente es gebaorte en doeëd woeë 't in 't laeve óm drieët, sjerneert wie 'n duur óm 'ne täölder, aope en toe. Bevuurbeeld: es ieëmes in de VUT geit, 65 wiert, trouwt, de zoeëväölste trouwdaag, gesjlaagd zin, 'ne bizóndere verjaordaag, de ieësjte baan en zoeë wier, meh dao mót mer ins 'n apaart book uëver oetkómme.
Allein luuj van de vief sjrieverskringe höbbe in dit book hun gedachtes neergesjrieëve: de krink Noord-Limburg (rónd Venlo), krink Wiert, krink Midde-Limburg (rónd Ech), krink Gelaen en de algemeine sjrieverskrink dae al mieë es 15 jaor in Zitterd biejeinkump.
't Doel van sjrieverskringe is baeter liere sjrieve in 't eige plat (en dan geit 't ech neet uëver de sjpelling), ze wille e klankbord höbbe vuur hun werk en daovan kinne liere.
Dat kint me aan dit Platbook ouch zieën, sommige sjtónt aan 't begin van dat lierproces, angere make vollierde juweeltjes.
De sjrieverskringe zint 'ne gówe kweekviever, want minstens 10 luuj van hun zint genomineerd gewaes vuur de Veldeke literatuurpries, vief höbbe dae pries ouch gewónne en zieëker 10 luuj höbbe ein of mieë beuk in 't plat gesjrieëve.
Houpelik deit 't uch get.
Samesjtèller Colla Bemelmans